【明報專訊】早前有報道話，醫學界議員梁家騮(怪醫)計劃喺立法會表決政改時缺席唔投票，或令政府爭取通過政改難上加難。但怪醫噚日話從來無講過缺席投票，直指呢個說法係亂吹。佢重申，「暫時都係」維持否決政改呢個立場，又以病喻政改，話政改至今「病情無變」，因方案無變，所以無新決定。 「暫時都係」維持否決 政府提出「出閘」逐一表決、2至N票，但怪醫認為逐一表決仲差過全票制，因為只有最高3名候選人出閘，分分鐘1000人提名都出唔到閘，可能好少數人策略性投票，都能夠影響出閘結果。 政府話「2017一定要得」，但怪醫引述中聯辦主任張曉明，話「個天唔會跌落嚟」，怪醫仲反問使乜咁緊張？佢透露政府最近無搵佢傾偈，自嘲「好濕碎，無關痛癢」，怪醫又透露不時同中聯辦都有溝通，但就無傾過有關醫學界民調嘅問題。 怪醫話，連食衛局長高永文醫生都無搵佢，不過消息人士話高局長其實下周約咗佢。
|
| |
| |
