車公廟對聯唔工整
扶鷥呂祖賜字無得改

沙田車公廟嘅幾副對聯，被質疑無論平仄同字詞都唔工整，原來呢啲對聯唔係出自文學家手筆，而係由道教儀式「扶鷥」寫出嚟嘅。圖中正門嘅「繞繞祥雲融匯城門河水 浩浩靈氣車公鎮護沙田」，就係其中一個例子。（華人廟宇委員會網頁）

【明報專訊】沙田車公廟喺2007年重修後，整咗6副對聯，不過一早就有中文專家寫文質疑啲對聯字詞音節全部都「唔對」，變晒「歪聯」，最經典係「晨鐘振奮工商界 暮鼓黃昏報平安」，平仄唔對之餘，仲要連字詞都唔對，好似「工商界」對唔到「報平安」，「振奮」對唔到「黃昏」。呢啲對聯究竟係點嚟？政府就向沙田區議會開估，原來係用道教儀式「扶鷥」(亦即扶乩)，華人廟宇委員會仲話呢啲句子可以當係祝福語，所以冇嚴格審視係咪工整同對稱。'

潘國森：平仄詞性都不對

廣府話保育協會會長潘國森2013年喺《百家雜誌》論盡車公廟嘅對聯，話每一對都有問題，例如正門嘅「繞繞祥雲融匯城門河水 浩浩靈氣車公鎮護沙田」，「繞繞」同「浩浩」都用仄聲字已經係錯，第二個「浩」字應該要用平聲字，而「融匯」對唔到「車公」，「城門」係地名，對唔到動詞「鎮護」。

街坊笑稱年年下籤因車公不滿

沙田區議員丘文俊同Emily講，近排好多街坊都問到車公廟對聯嘅問題，街坊仲講笑話難怪求籤年年都係下籤，梗係車公唔滿意啲對聯啦。

政府同華人廟宇委員會回覆沙田區議會嘅書面提問，揭露原來呢啲對聯係用「扶鸞」得來，話係呂祖先師所賜。所謂「扶鸞」就係由兩個人拎住支Y形嘅筆，喺沙上面寫字，一般視為神諭。委員會話基於尊重宗教信仰同傳統，唔適宜改動呢啲對聯。

更多港聞

立法會教路搵基本法文憲

【明報專訊】今年係《基本法》頒布25周年，立法會秘書處噚日就舉行咗一個傳媒工作坊，教吓大家可以點樣運用立法會憲制圖書館嘅基本法館藏，搵出同查... 詳情

葉太fb：大量菲傭淪性資源

【明報專訊】新民黨主席葉劉淑儀噚日喺facebook貼咗張標題為「大量菲傭為外國人士提供性服務？」嘅圖，附上佢喺《明報》專欄嘅內容，提到香港... 詳情

蕭副局做過全職話劇演員

【明報專訊】唔講唔知，原來勞工及福利局副局長蕭偉強後生都係個「文青」，喺做政府行政主任（EO之）前，都做過一排香港話劇團全職演員，仲曾經演出... 詳情