【明報專訊】政府有意扶助電影業發展，噚日亦委任一批電影業製作人員入去電影發展局做委員，包括《狂舞派》嘅新晉導演黃修平、憑《殭屍》攞咗舊年香港電影金像獎最佳視覺效果獎嘅陳志道，同埋製作《那夜凌晨，我坐上了旺角開往大埔的紅Van》、麥嘜動畫等嘅幕後製作人員。

馬逢國續任電影發展局主席

新一屆電影發展局任命今年4月1日起，為期兩年。立法會議員馬逢國繼續做主席。今次18個非官方委員中，有7個係新委員。馬逢國話，今次有啲新晉電影人入局，電影發展局首要目標係諗方法培育電影新人、搵接班人。

政府早排話過，喺各區搵地開戲院，引嚟唔少人質疑；但馬逢國話，如果無戲院播放，又點會有人投資拍戲呢？佢又話，政府?家答應咗研究喺西九文化區、啟德等新發展區域搵地畀戲院營辦，希望最終可以成事。佢話?家一啲區域，好似北區、大埔、深水埗，都搵唔到戲院。

馬逢國又話，佢哋嘅職能除咗透過電影發展基金資助新人拍戲，亦要幫港產片開拓內地市場。佢話政府雖然同內地簽咗CEPA 10，令粵語港產片可以喺廣東省發行，但未搞掂審批問題，萬一有戲上映，但審批拖慢內地上映日期，咁就效益大減喇。