【明報專訊】香港蘇富比春季拍賣一連4日舉行，噚日又有藏品以高價成交，其中一件以白玉製成嘅「雍正御筆之寶」方璽(圖)，本來估價3000萬至4000萬港元，最後有9個人競投，最終爭到1億490萬港元成交。雖然個價都幾高，但呢個玉璽，仲未夠2010年10月成交嘅清乾隆御寶「信天主人」交龍鈕白玉璽咁貴，當年個玉璽成交價要1億2162萬港元。

另外，一個日本珍藏嘅南宋官窰青釉八方瓶，由上海龍美術館擊敗7名競投者，以1億1390萬港元成交。目前宋代瓷器世界拍賣紀錄，係2012年4月售出嘅北宋汝窯天青釉葵花洗，成交價2億786萬港元。