與馬貼近 濕身睇Cavalia
前排觀眾派毛巾

Cavalia馬術匯演最後一幕，沙池會被注水變成水池，50匹馬仲會逐一出場「曬冷」表演，配合唔同光影投射，恍如置身仙境。（林俊源攝）

舞台與最前排觀眾距離不足兩米，部分表演觀眾幾乎掂到馬，現場感十足。（林俊源攝）

【明報專訊】今日係Cavalia馬術匯演開幕首演，Emily噚日同一眾行家一齊去中環新海濱睇咗45分鐘簡短版預演。舞台背景由60米長嘅巨型熒幕組成，演出期間場景不斷轉換，由森林、草原到大漠一一收喺觀眾眼底，睇一個表演好似去咗幾次旅行咁。

Cavalia嘅特色係現場音樂會配合馬自由自在喺舞台奔放，Emily發現馬每停一下，現場音樂真係會跟隨暫停，相信伴奏者要好集中留意馬兒至得。空中飛人仲會隨馬一齊表演，當然唔少得表演者喺奔跑嘅馬背上站立，少啲平衡力都唔得，但最厲害嘅表演——一個人腳踏兩隻馬嘅馬背一同飛馳嘅Roman Riding，就要觀眾買飛入場先睇到。

今公演 50匹馬水池奔跑

藝術總監Normand Latourelle提過會於最尾一幕喺沙池上注水，今次Emily親眼睇到50匹馬喺水池奔跑，好震撼，最前排觀眾距離馬不足兩米，隨時「濕身」，大會準備毛巾畀坐最前排嘅觀眾遮擋同抹身。不過噚日帳篷內好焗，觀眾都出晒汗，Normand亦焗到面紅紅，佢同大家講冷氣仲差一啲零件未裝上，會確保今日首演冇問題，相關牌照亦會喺今日當局作最後巡視時正式批出。佢仲叫大家唔使擔心會熱親啲馬，因為佢哋最熱試過喺42℃嘅秘魯表演。大會噚日再宣布加開14場，Normand話香港人對馬熟悉，反應熱烈，有望遲吓再加場喎。

更多港聞

肥胡回味同蓋茨食飯

【明報專訊】醫管局前主席胡定旭（肥胡）啱啱出席完博鰲論壇，佢笑嘻嘻同Emily講，喺博鰲佢同微軟創辦人蓋茨（Bill Gates）一齊食飯，... 詳情

港視網站停頓4小時

【明報專訊】香港電視開台至今主要靠手機App同官網，提供直播、點播同網購等服務，點知呢排追開《導火新聞線》嘅Emily，噚日晏晝無辦法上到H... 詳情

民航處羅崇文3年外訪19次

【明報專訊】民航處最近成為議員炮轟焦點，近日議員向政府問及有關財政預算案嘅問題中，亦有唔少關於民航處。好似人民力量陳志全就問民航處長2012... 詳情

料每年百萬 田二少捐膠袋費

【明報專訊】聽日（4月1日）起，膠袋收費全面喺所有零售店舖推行，到時除咗獲豁免情况外，零售店舖唔可以免費派發膠袋畀顧客，每個膠袋最少收5毫。... 詳情

日均183.5升 港人用水變化不大

【明報專訊】香港近年都宣傳節約用水，但據水務署數字，港人人均住宅用水量嘅變化不大，維持喺每日180多升水平，2013/14年度每人每日平均用... 詳情