梁美芬話通識科「無王管」
批「黃色哲學」老師
【明報專訊】經民聯議員梁美芬(圖)噚日喺立法會提出「全面檢討通識教育科」嘅無約束力議案,認為要檢討課程設計、教學範圍、考核方式,以及師資培訓等各方面。梁美芬喺開場白話,好多家長都擔心所謂通識科培養嘅批判思維,令到小朋友對政府有好多負面情緒,「(小朋友)覺得所有人都欠咗佢……連自己生得唔靚追唔到女仔都係政府、制度嘅錯」,仲話有咁多學生參與佔中,「如果話同通識科無關,就一定唔係」,又話好似一個無王管嘅科目。
指「批判」思維使小孩對政府負面
梁美芬話自2009年通識科實施後,至今收到超過1000名家長投訴,老師同學生嘅求助亦未曾中斷,話曾經收到家長求助,指個女喺學校通識堂學咗繼承法後,叫父母快啲去死,可以分財產。
佢又話通識科「無為而治、漫山放羊」嘅教學方式,令部分有強烈「黃色哲學」嘅老師,用自己通識科嘅平台宣傳喜歡嘅政治理念,又擔心學生無充足資料明辨是非,會被洗腦。
民主黨黃碧雲就反駁話,梁美芬嘅議案多餘,因為當局正檢討新高中課程,質疑梁美芬美其名關心通識科發展,其實係以政治角度針對通識科。教育局長吳克儉回應時就話,通識教育科中期檢討嘅方案和長遠發展方向,預計於7月公布。