【明報專訊】下月復活節，今年踏入130周年嘅馬會，會喺4月3至5日(周五至周日)於沙田馬場及彭福公園舉行「同心同步同樂日」。到時有不同活動，包括有1.3萬隻按國畫大師徐悲鴻《奔馬》造型、用環保紙做嘅「駿馬」，聯同8隻6呎高嘅駿馬雕塑現身會場；小朋友亦有機會試吓策騎小馬、同雪特蘭小馬影相，一家大細玩餐飽。

而如果你熱愛足球，又係2001、2002或2003年出世，就可以去「同步動起來」主題區，參加足球技巧挑戰賽，仲可以喺4月3日及4日到場同曼聯一代名宿艾雲見面，曼聯球迷不容錯過。

曼聯名宿見球迷 藝術家領千人繪巨畫

活動有得玩亦有得睇，首次來港嘅奇幻馬術匯演Cavalia特技藝人會在場表演，著名藝術家馬興文會帶領1000個中小學生，一齊畫一幅長130米嘅巨型畫作。如果大家想到場玩，可以預先上網登記攞免費入場券(網址係http://www.130.hkjc.com)，19號開始可以喺指定40間場外投注處免費領取入場券，預計會派發逾1萬張飛。