【明報專訊】由法律界人士組成嘅新議政團體「法政匯思」噚日去咗九龍太子開記招，為未來落區推廣法治打響頭炮。「法政匯思」一共有3個召集人，除咗有成功向律師會前會長林新強發起不信任動議一舉成名嘅律師任建峰，仲有被任形容為法律界新「男神」，與前律政司長黃仁龍、現任司長袁國強同樣來自Temple Chambers嘅大律師梁允信(Wilson)。被問到高調加入議政平台會唔會擔心無生意，32歲嘅Wilson就話唔怕，並回咗一句﹕「方丈小器都無辦法。」 法政匯思目前大約有50人，主要係年輕律師，不過部分考慮到工作關係不便拋頭露面，搞到連一直低調、大隱隱於市嘅「文律師」都要出嚟做召集人。 佔中支援熱線文律師現身 如果你有留意新聞，不難發覺有個「文律師」專門幫社運人保釋打官司，就連佔中被捕有條支援熱線都係打去搵「文律師」，但接聽嘅有男有女，搞到警方都去打聽究竟「文律師」係男定係女。噚日「文律師」終於現真身，原來佢係男士，真名叫文浩正。 Emily問文律師喺熱線中「come out」現身有咩感受，文律師繼續低調話﹕「無咩特別。」
|
| |
| |
;){kind=small}
