【明報專訊】佔領行動落幕，學聯秘書長周永康喺佔領啟動後3個月之際，喺facebook寫咗一篇3000多字嘅鴻文〈前思後索催淚煙後的風雨飄搖〉，要為喺運動中犯下無法挽回嘅錯，向支持者致歉喎。對於被批評勾結泛民賣港，佢就同支持者打「強心針」，表明學聯係「泛民眼中的硬頸派，也是反赤化最着力及最狠的一分子」。

早前有電視台專訪周永康，因為記者一句旁白，令人誤以為學聯「設局害人」叫人去衝擊政總。周永康話，有惡意挑釁者借機扭曲說話，令到身邊相信學聯嘅朋友有感被出賣，令佢覺得好內疚，「是我至今最無法釋懷的事情」。周永康話，如果自己真係一個推自己友去死嘅人，「各位不妨手起刀落」，重申「撫心自問，周永康絕無此心」。

作為學運領袖，周永康承認無法同部分支持者建立信任，當中更因為流言蜚語，令人瓦解對學聯嘅信任，「這是我的失敗」。對於仍然信任學聯嘅朋友，佢亦有話說，「為不時要各位憂慮浮躁，不得不向各位致敬及致歉」；至於對學聯有動搖嘅人，周永康都覺得一時三刻嘅解說無法冰釋前嫌，只能祈求學聯以行動重建信任，亦證明學聯從來都無心懷歹毒嘅惡意。