【明報專訊】一班「外國勢力」噚日現身金鐘佔領區及立法會，包括美國駐港總領事夏千福，同埋之前大讚香港年輕一代嘅德國總領事蘭布斯多夫(Nikolaus Graf Lambsdorff)，佢哋唔係「勾結」泛民議員，而係因為立法會主席曾鈺成請食飯。出席嘅立法會議員中，10個建制、5個泛民，最後夏千福由民建聯主席譚耀宗相伴離開宴會廳，連譚sir都話好少有機會同夏千福合照。 立法會主席每年度都請領事食飯交流，過往總領事可以車出車入，但因為佔領封路，夏千福噚日就喺對面中信大廈落車，再經佔領區步入立法會大樓；德國總領事蘭布斯多夫飯後就直接喺佔領區行返辦公室。佢同Emily講，因為領事館喺金鐘，所以佢成日路經佔領區。 外國公僕不能讚違法學生 蘭布斯多夫話，見到佔領發生，同香港好多人一樣，感到驚訝，但唔認為佔中對香港整體經濟有乜嘢影響，亦無聽過在港德國商家投訴，仲話香港仍然好有競爭力，係宜居城市。 至於點解佢早前選擇喺政務司長林鄭月娥面前讚賞香港年輕人呢？蘭布斯多夫解釋，嗰次係德國國慶日活動，向台下賓客講話，佢話當日係講香港年輕人嘅表現值得港人驕傲，唔係只講佔領區嘅年輕人。不過，佢話自己不時都被人引述錯誤，佢話學生做緊違法行為，「我作為外國公務員，怎能讚他們？」(I'm a civil servant from a foreign country, how could I praise the students？)
|
| |
| |
;){kind=small}
;){kind=small}
