【明報專訊】西九大型戶外藝術節「自由野2014」將會喺11月22至23日舉辦，嚟到第三屆，主辦單位話節目係舉辦以來最多元嘅，不過之前免費入場，今次就轉咗要收費，正價位位50蚊。

西九管理局表演藝術行政總監茹國烈同Emily講，今次自由野嘅表演陣容係3年來最大型，請到西班牙家傳戶曉劇團La Fura dels Baus嚟亞洲首演，演出嘅互動智能劇場《M.U.R.S牆》係全球首創，觀眾要即時用手機參與。

Emily仲聽到原來帳篷唔止係佔領區先有，自由野亦會有10個帳篷豎立喺大草地，入面會有舞蹈表演同舞蹈電影睇。噚日示範嘅街頭舞者阿Yip亦戴上保護眼罩表演，以舞蹈呼應近日嘅佔領行動。

自由野於西九海濱長廊舉行，正價票50元，全日制學生、長者、殘疾人士票價20元。如要觀賞《M.U.R.S牆》就需另外購票，正價150元，優惠票價100元。