【明報專訊】服務《明報》集團28年嘅明報總編輯張健波(人稱「張波」)，返埋聽日就正式退休，一大班明報新知舊雨噚日周日提早設宴歡送。張波席間盡吐心中情，透露喺明報咁多年，只為一件事喊過，就係1989年六四事件，仲話佢自己性格得罪人多，能夠喺明報做到今日，真係「感恩」。 入明報以來只為六四喊過 大家都好關心，張波退下火線，由邊個接任，張波就透露目前集團內有兩個人選，只待老闆世界華文媒體集團主席張曉卿「一念之間」作決定。相信人選好快會揭盅。 明報現職及舊同事，噚日喺灣仔一酒家筵開10席歡送張波，近年迷上跑步嘅張波，朝早喺酒家附近跑完步先嚟食飯。同事問張波退休後有乜嘢做，佢話搵咗一份「兼職」，每星期返5日工，每日做3個鐘，呢份工就係「跑步」！編輯部同事都好知佢性格，專登炮製咗一份「明報特別版」送畀佢留念，「頭版」大題就係「長跑長有」，仲配上張波跑步衝刺嘅漫畫(見圖)。 張波臨別贈言，心情睇嚟幾輕鬆，唔見離愁別緒嘅感覺，佢同同事講，話自己係「麻煩人」、「得罪人多」，所以喺明報每過一日都係bonus。佢又爆料話，過往有唔少人去老闆度投訴佢，但幸好有老闆信任，所以對老闆有感恩之心。 憶飲醉嘔吐 老婆罰抹地 張波話，喺明報咁多年，只曾經喺六四事件時喊過一次；另外，佢試過幾次飲醉酒，主要係去同事婚宴時太開心所致，有一次飲到醉醺醺，返到屋企嘔吐大作，結果老婆罰佢要自己清潔地板！
|
| |
| |
;){kind=small}
;){kind=small}
;){kind=small}
;){kind=small}
;){kind=small}
