【明報專訊】食物及衛生局長高永文噚日下晝遊新界，一次過去晒流浮山蠔排、米埔魚場、粉嶺水耕農場同打鼓嶺有機農場參觀，聽吓經營者對本地漁業同農業有乜意見。局長同業界交流之餘，仲周圍試食沙律菜、火龍果同粟米，佢當然唔係齋食，全部用真金白銀支持，除咗喺一間室內養殖魚場買咗條斤幾嘅花尾龍躉，仲買咗幾條有機粟米返屋企，認真豐收。

高永文噚日孖住食衛局常任秘書長(食物)黎陳芷娟遊新界，先去流浮山了解蠔農嘅「浮排養殖法」，再去米埔參觀兩間水產養殖場，第三站去粉嶺睇專種沙律菜嘅水耕農場，最後係無花果、火龍果同粟米都相當出名嘅一間打鼓嶺有機農場。其實新界除咗有本地水產、農產品，本地雞都好出名，但高永文噚日就無順便參觀雞場，睇怕啲雞同局長無乜緣分喎。