【明報專訊】「保普選反佔中大聯盟」噚日下午遊行，建制派社團群起撐場，Emily噚日見到嘅社團名稱，真係感到祖國嘅強大，連「福建農村大學同學會」都可以動員到場。至於噚日早上嘅「跑步上中環」人數就大失預算，大會原本申請萬人跑步，最後公布只有1500人參加，警方統計數字則為880人。

周融﹕數字唔重要

大聯盟發起人周融就話「數字唔重要」，稱1500人參加已經「好理想」，仲解釋跑步人數少可能係時間太早、香港人鍾意有競爭嘅跑步比賽，但「跑步上中環」無得計時，同埋有人可能覺得路程只有4公里太短，唔感興趣。

噚日下午嘅遊行有唔少建制派重量級人馬現身支持，好似全國政協常委陳永棋就行咗兩轉，起步後行到銅鑼灣就折返維園，同廣東社團總會嘅兄弟行多次。不過，自由黨方剛同張宇人就話，佢哋年紀大，要知道自己嘅限制，所以都係「上台、起步、鬆人」算喇。

經民聯立法會議員張華峰都有現身遊行，身為金融服務界嘅佢話幾辛苦都要行足全程，仲同Emily講自己好耐無去過遊行。至於對上一次係幾時？佢話係1989年嘅百萬人大遊行！