港人最唔願幫新移民

[2014.07.31] 發表

【明報專訊】香港人出晒名鍾意行善，但都唔係見人就一定肯幫㗎。「築福香港」噚日公布委託港大賽馬會防止自殺研究中心幫手做嘅「2014香港助人指數」調查結果，當中問到受訪者肯幫助邊一類有困難人士，發現最多人唔願意幫助大陸新移民。

「築福香港」委託港大，喺今年4至6月透過隨機電話調查訪問咗1104名15歲或以上嘅香港居民。受訪者被問到，如果見到唔同人士遇到一樣困難，佢哋肯唔肯出手相助。揀絕對願意或願意幫大陸新移民嘅有38.9%，而絕對不願意或不願意幫手嘅就有14.2%，所受對待係所有人士類別中最差嘅(見表)。

呢個調查係第一次做。扶貧委員會「築福香港」工作小組主席紀文鳳話，近年中港矛盾嚴重，加上𠵱家媒體炒作過熱，好多市民都誤會新移民一定係嚟搶香港人嘅資源，但實際上領綜援嘅大部分係香港人。紀文鳳呼籲港人應對新移民一視同仁，盡力幫佢哋，社會先會和諧。

助人指數47分學者：唔算冷漠

調查亦根據唔同指標，計算出首個香港助人指數，以100分滿分，評分為47。對於分數未達50是否理想，港大賽馬會防止自殺研究中心葉兆輝教授就話，呢個評分顯示香港唔算冷漠。

此外，調查發現近93.2%受訪者喺過去一個月曾經幫人，如搭公共交通工具時讓座。而女性一般較肯親身幫人同捐贈物品，男性就傾向捐血助人。

更多港聞