【明報專訊】花式跳繩跳出香港創意。今年世界跳繩錦標賽由香港奪得主辦權，29歲嘅港隊召集人文家駒可謂功不可沒。文家駒接受政府新聞網訪問，回首過去十幾年嘅跳繩路，例如首次為香港出戰，今次仲成功申辦世錦賽，難怪佢話花式跳繩改變咗佢嘅人生。

文家駒除咗係港隊召集人，亦係運動員，佢話中學時代已與跳繩結緣，本身唔肥嘅佢參加咗學校嘅「花式跳繩減肥班」，其實被花式二字吸引，一跳鍾情，高中已經係教練。佢經歷無數挫折，試過點練都快唔過其他國家運動員，會氣餒，好在後來走去玩表演盃搵到新樂趣。

世錦賽今開始 港隊強調港味

世錦賽壓軸項目表演盃，每個國家或地區最多可派16人組隊，配合伴奏音樂喺8分鐘內傾力演出，港隊喺2010年嘅英國世錦賽上就打敗三連冠得主比利時奪魁。當時有份參賽嘅女將張琬茹認為，港隊致勝關鍵係創意，唔止着重難度，仲融入香港特色，令觀眾投入。本港今次派出歷來最多嘅159名選手參加，亦會加入本地元素，如以1980年代流行曲作配樂，希望再取得佳績。賽事今日至8月初舉行，文家駒希望比賽有助推廣跳繩運動，又可以畀市民睇到港隊嘅強勁實力。