風球下書展人流跌

3號風球吹走咗啲人流，但吹唔走名人，通訊局主席何沛謙嘅公子何善彰（右）搞新書簽名會，公民黨梁家傑（中）同埋余若薇（左）嚟到捧場。

【明報專訊】3號風球連帶吹走書展人流同銷情，有書商話噚日書展客流少咗一成，上年熱賣嘅政治書今年都賣少咗，加上租金加咗5％，喺人工、運費嘅壓力底下，部分書店唔太睇好今年嘅銷情。噚日雖然打風少咗人嚟，但都有唔少名人捧場，例如有王維基、葉劉淑儀、梁家𠎀、陶傑，星光熠熠。

尚書房負責人就話，今年有好多人齋睇唔買，即使畀咗八折都谷唔到銷量。樂文書店就話今年心理、動物同散文書最多人買，反而上年熱賣嘅政治書就賣少咗，關於南北韓嘅書今年都賣少咗至少七成。為咗收支平衡，樂文書店就減少咗一半人手，負責人同Emily講，雖然希望今年銷情比上年增加一至兩成，但到𠵱家同目標仲有好大距離。

夏蕙姨回憶錄賣3000本

出版黑紙嘅白卷出版社就對銷情好樂觀，負責人話，即使係打風都無咩大影響，今年銷量比舊年同期仲升咗倍半，特別係夏蕙姨嘅回憶錄已經賣咗3000本。突破出版社就話，因為打風，𠵱家仲未預計到銷量，但今年多咗人買旅遊、生活創意類嘅書，所以對銷情都仲係樂觀。

更多港聞

白韞六：領袖最緊要廉潔

【明報專訊】前廉政專員湯顯明捲入酬酢風波，損害廉署形象。現任專員白韞六（圖）噚日出席青年組織活動話，一個人唔廉潔，唔單止影響個人聲譽，仲會破... 詳情