【明報專訊】無見一排嘅港視主席王維基(Ricky)噚日出席書展研討會，同陶傑等人討論本地書業發展，佢話雖然不時接觸電子嘢，但其實佢買實體書仍多過電子書，例如單係蘋果電腦創辦人之一Steve Jobs自傳，佢就買咗英文、中文繁體同簡體3個版本，仲透露原來大約6年前，佢搵教育局傾過考慮收購本地3、4間教科書出版公司，打算推出電子書，但當年教育局未開始審批電子教科書，令佢「有心」都要放棄。

購物平台料年內推出

Ricky話，佢搞嘅電視節目兼購物網上平台，預計今年內可推出，而將軍澳多媒體創意中心已重新啟動工程，期望明年底前可投入運作。佢認為營運電視業可以承傳香港文化，所以𠵱家無論係電影、電視或者出書，就算內地市場好重要，香港市場都唔可以忽視。對於免費電視牌照公眾諮詢今日結束，同埋就發牌提出司法覆核下月進入法律程序，Ricky只係話持積極態度，希望有好結果，等佢繼續有信心喺香港從事電視業務。