【明報專訊】立法會財務委員會主席吳亮星自從上星期五財委會後，仲未肯回應記者提問，每次被記者追訪，都係急急腳走。噚日，人民力量議員喺答問大會上，向特首梁振英掟紙條摺成嘅幸運星，以示不滿吳亮星強行通過新界東北發展前期撥款。一眾記者噚日喺答問大會後，當然希望吳亮星回應幾句，但佢唔單止唔回應，仲獲保安特別照顧，護送離開𠻹。

見記者掉頭走

話說大批記者到立法會採訪答問大會，見到吳亮星步出會議廳，於是上前追訪。吳亮星見到咁，掉頭行返入會議廳，過咗無耐，由側門離開。一眾保安隨即為佢開路，原本打算行去搭𨋢返上辦公室嘅吳亮星，喺保安建議同護送之下，搭電梯落地下轉𨋢，至少五六名保安將佢重重包圍，保安仲叫記者唔好推撞，令到記者無法繼續追訪。

講番答問大會，立會保安嚴陣以待，喺梁振英準備離開前，眾保安已喺會議廳外手拉手，築起長長人鏈，過去甚為少見。