【明報專訊】喺官場有歌王之稱嘅民政事務局常任秘書長楊立門，宣布退休，佢𠵱家53歲，加上累積咗一年大假，按舊退休金計劃55歲退休，就可以食長糧，實在令唔少公務員大為羨慕。佢老頂、民政事務局長曾德成高度讚賞楊立門，又話大家合作無間；至於接替佢嘅，係康樂及文化事務署長馮程淑儀，而教育局副秘書長李美嫦就接掌康文署長一職。

李美嫦接掌康文署

楊立門離開政府一事之前已傳到滿天飛，大家只係等正式公布。𠵱家做AO(政務主任)認真唔易，楊立門早前有份支援「築福香港」，聽聞有人對佢同啲公務員唔多滿意，覺得公務員乜都講程序，唔夠落力變通，唔知係咪導火線，壓力太大，令楊立門索性夠鐘就走。不過外面世界咁大，以佢嘅歷練，要搵工真係唔難。