人力「叮叮」攻勢「罰建制」
頻促點人數 要議員無飯食
[2014.06.19] 發表
【明報專訊】雖然財政預算案已經通過，但噚日立法會大會上，點算人數鐘聲不斷，皆因人民力量陳偉業(大嚿)同陳志全，喺成個會議期間不斷話唔夠人開會，搞到平日中午後都會完結嘅6條口頭質詢環節，去到黃昏先完成，唔少建制派議員都不明所以，問記者究竟有咩事又激嬲人力佢哋？
話政府不撤東北 要行動升級
兩人噚晚就同記者宣布，話要正式同政府全面開戰，因為政府唔肯撤回新界東北計劃撥款，即使面對民意反彈亦「死性不改」，所以決定將行動升級，話呢個做法亦要向建制派施壓，因為如果建制派唔肯畀票政府，政府亦無得霸王硬上弓，所以要「懲罰保皇黨」。陳偉業又話噚日中午時分要求點人數5次，要去咗食飯嘅建制派議員不停急趕回會議室，要令建制派無安樂茶飯食喎。
陳志全表明嚟緊會就住每一項議案提出大量修訂，迫使政府重新諮詢新界東北發展；大嚿話喺其他委員會會議亦會不斷提問拖延。人力不斷要求響鐘點人數，但建制派似乎亦無所謂，唔少人私下話最好唔夠人流會，等大家可以早啲收工。
曾主席話蔣麗芸「刺耳」
入夜後人力議員仍不停要求點人數，終於搞到民建聯蔣麗芸發火，要求主席處理吓，佢質疑議員「發神經」咁不斷要點人數，但其他泛民又唔出現，對建制派好唔公平。佢牢騷不斷，搞到立法會主席曾鈺成忍唔住「勸喻」，同蔣麗芸講「我建議你少講啲無乜用嘅說話，加上你個咪好刺耳」，搞到蔣麗芸無晒癮。
聽日星期五財會繼續討論新界東北撥款，原本建制派會同特首梁振英食晚飯，原來亦已取消，Emily聽聞係由議員提出嘅，有人話即使到時財會開完，但議員亦未必走到，因為一旦示威者包圍立法會，佢哋亦無得輕易離開。
更多港聞
【明報專訊】傳媒報道上周五立法會衝擊事件，搵各方人等評論作平衡報道係好正常嘅事，但民建聯陳鑑林就借事件乘機鬧香港電台「美化」暴力。噚日工聯會...
詳情
【明報專訊】《紐約時報》噚日喺A9版登出一個全版廣告呼籲6.22投票，著名漫畫家尊子證實廣告上嘅漫畫出自佢手筆，尊子話漫畫係其他活動嘅作品，...
詳情
相關新聞
