【明報專訊】噚日母親節雖然落大雨，政黨都趁機落區派花爭取市民支持，好似有個10歲囡囡嘅民建聯立法會議員李慧琼(Starry)，就去咗東區南豐選區度，為今個月舉行嘅補選幫人拉票，佢話阿女整咗張卡畀佢，又送朱古力花，夜晚亦約佢食飯。而其他媽媽議員都有sweet嘅一日。

至於經民聯梁美芬亦忙住落區，噚日先後去黃埔、青衣等地方派花，親子活動竟然係佢老公王貴國同個仔一齊陪佢落區派嘢。梁美芬話佢一早講明要落區，其實最好嘅母親節禮物，就係屋企人陪埋佢去。佢黨友盧偉國落區派花之餘，亦即場吹奏色士風演繹《頌親恩》，向一眾媽媽致敬。

新民黨主席葉劉淑儀同阿女Cynthia感情要好，噚日Cynthia就請阿媽去南區食午飯，阿女埋單之餘又送花，仲送上按摩椅背，等佢喺立法會有拉布時被困議會都唔怕。葉太話特別珍惜同阿女嘅相處時間，因為今年秋天Cynthia就要返美國升學喇。

張超雄同基層媽媽遊行

除咗慶祝，亦有團體趁母親節請願，工黨張超雄噚日參與兒童照顧者聯席母親節遊行，用黑色康乃馨控訴政府唔理貧窮母親嘅困境，因為基層媽媽想外出工作，但根本申請唔到全港只有5500個課餘託管名額。公民黨郭家麒就去咗青衣向市民送上鮮花，話祝願各位母親母親節快樂。