【明報專訊】國泰航空星期日(23日)又會喺國泰城總部舉行「機艙服務員招聘日」，計劃會請1000個空姐、空少衝上雲霄，配合公司增加飛機同航站等業務需要。根據國泰資料，過去兩年因為經濟同旅遊業發展影響，公司只係分別請多咗600人同700人，所以今年係3年嚟招聘最多空服員嘅一次。

3年嚟請得最多

講番招聘日，國泰會先安排應徵者參加職業講座，接受手臂伸延測試(觸及208厘米)、小組討論同語言測試。經初步評估及格者，可以有第二輪面試機會，國泰提醒應徵者要識講流利英語，同有其中一種亞洲語言嘅溝通能力，包括粵語、普通話、日文或韓文等，亦要喺中學會考拎到5科及格、或文憑試有5科2級程度，包括英文科。錯過咗招聘日嘅話，可登入國泰網站http://www.cathaypacific.com/careers做網上申請，一樣可以爭取飛上3萬呎高空工作嘅機會。