【明報專訊】今年係廉政公署成立40周年，下星期六(2月15日)起一連兩個周末(其中3日)，會喺北角廉署總部搞開放日，市民可以參觀錄影會面室、列隊認人室、廉署人員槍械設備等，仲可以試吓廉署最出名嘅咖啡。最特別係當日會有40年嚟首次展出、好有歷史價值嘅廉署物品，至於係乜嘢，廉署同Emily講要賣個關子先，等市民親身嚟發掘吓喎。
廉署預備咗5300張門票，市民即日起可以喺廉署網站(http://www.icac.org.hk)申請，亦可以喺廉署大樓或任何一間廉署分區辦事處索取，呢個周六廉署會招待Emily同其他行家預先參觀。廉署開放日時間﹕
2月15日(上午9時至下午7時半)；2月16日、2月23日(上午9時至下午6時半)。
