【明報專訊】香港電台噚日公布「2013電視節目欣賞指數(第三階段)調查」結果，第一位係港台嘅《鏗鏘集》。近日備受批評嘅無綫有3個節目入選十大，包括電視劇《衝上雲霄II》；而喺免費電視牌照風波中被指內容偏頗嘅無綫節目《東張西望》，喺72個節目排名中排第41，同樣被批評嘅亞視《微播天下》就排倒數第5。

亞視無節目入20大

港大民意研究計劃鍾庭耀話，排名指數最高嘅20個非新聞財經報道節目中，港台佔13個、無綫佔5個、有線有兩個。不過，是非多多嘅亞視就係1999年調查開始以來，首次無節目入選20大。

4電視台評分跌

鍾庭耀仲話，喺新聞財經報道節目方面，除咗香港寬頻外，其餘4間電視台嘅評分都較上一階段嘅調查下跌，無綫同亞視分別跌咗0.3分同1.99分。鍾庭耀分析話，評分或多或少同電視牌照爭議有關。

港台委託港大民意研究計劃做今次調查，佢哋喺10月2日到28日期間，以電話成功訪問2031個9歲以上、講廣東話嘅香港居民，了解佢哋對今年7月1日到9月30日播放嘅本地製作節目嘅欣賞程度。