【明報專訊】立法會主席曾鈺成喺今次政改討論好積極，一時發表「心魔論」，一時又表明政改唔應該排除任何政黨人士，仲多次講到如果2017年落實唔到普選會好大件事。其實佢唔止公開講，私下亦頻頻同唔同方面嘅政界人物講政改。除咗佢，原來前財政司長梁錦松都為政改好努力，過去兩三個月，就同曾主席孖公仔一齊出席多場政改飯局。 澄清報道：笑言唔知特首可「孖咇」 曾鈺成噚日喺立法會回應有關全國人大常委會副秘書長李飛聽日同各界人士食飯時，原本打算轉身離開嘅佢，忍唔住主動同傳媒澄清一些報道不實。佢話有報道指佢同梁錦松係「行孖咇」選特首。Emily睇番，原來網站《巴士的報》有篇咁嘅報道。曾主席笑言，唔知原來特首可以兩個人一齊做，強調出席飯局，佢同梁錦松目的都只有一個，就係積極為2017年落實普選盡力做工夫。不過，曾主席話唔希望因為「無聊、無根據」嘅報道嚇怕人。 被問到報道指佢好欣賞梁錦松等，記者問題都未講完，近年少發火嘅曾主席直截了當話，報道中除咗提到佢同梁錦松個名、二人一齊出席飯局外，「其他嘢都係作嘅！」
|
| |
| |
