【明報專訊】今年係「中大新聞獎」10周年，咁啱又係中文大學50周年金禧校慶，噚日舉行新聞獎頒獎典禮，由校長沈祖堯頒獎。《明報》偵查組副組長覃純健憑《特區高官系列調查》及《烏坎事件專題報道》，勇奪新聞報道組及專題組兩個大獎，成為大贏家，可喜可賀也！Emily作為佢嘅同事，感到與有榮焉。

覃純健有份參與調查唐英年夫婦私建唐宮、梁振英山頂大宅多處僭建，寫成《特區高官系列調查》，這兩宗新聞嘅影響力，實在不用多說。另外，《明報周刊》專題組資深記者陳伊敏，憑着《拾荒江湖(阿婆版)》，奪得專題組優異獎。

今年大會頒發10個獎項，得獎者都係行內肯拼肯搏嘅記者，Emily在此祝賀各得獎者繼續爆料，推進社會邁向真善美。沈校長話，勇於發掘問題，尋找答案，成為勇於承擔嘅人。呢啲特質，亦都係作為新聞工作者必須具備嘅條件。「中大新聞獎」正正可以對這群默默堅守新聞專業操守、努力維護香港新聞自由嘅人才予以肯定。

有線《李旺陽專訪》得電視專題大獎

有線電視廣州記者站主任林建誠憑《李旺陽專訪》，奪得電視專題組大獎，佢有感而發，表示會將此獎送畀李旺陽及李的好友尹正安。林建誠話，尹正安最近又喺湖南邵陽市被拘留10天，噚日早上先釋放，尹對於《李旺陽》報道獲獎感到欣慰，亦係頒獎典禮最感人嘅一刻。