【明報專訊】前政務司長唐英年做官時，一直無時間處理家族基金會嘅事，噚日唐唐到上海出席佢爺爺唐君遠倡議成立嘅「唐君遠教育基金會」會議，接替阿爸唐翔千出任基金會理事長。佢話感責任重大，因基金會致力內地教育工作，培訓人才，佢會以爺爺爸爸做榜樣，憑住「一個都不能少」嘅精神，做好基金會工作。

唐唐參觀基金會時睇番牆上嘅舊相，包括一張爸爸唐翔千(前排左六)同已故領導人鄧小平(前排左五)嘅合照。原來張相係1984年簽《中英聯合聲明》後，香港工商界仍有憂慮，做緊工業總會主席嘅唐爸爸同一班工商界代表上京，獲鄧小平接見，仲一齊合照。唐唐喺張相度除咗睇到爸爸，仲見到遠房叔伯、時任香港總商會主席唐驥千(前排右四)。

(唐英年提供)