【明報專訊】近日網上瘋傳警務處前處長李明逵(Dick sir，2003至07年做處長)1992年接受英國廣播公司(BBC)訪問嘅截圖，話佢同同事當年好驚97回歸之後，要收柯打做啲違背意願嘅事，例如對群眾使用不必要嘅武力。喺唔少人質疑警方政治打壓示威者嘅今日，唔少網民讚Dick sir有遠見，講嘢「應驗晒」。 Emily搵番條片嚟睇，原來係BBC拍嘅一條叫The Last Governor (末代港督) 紀錄片，追蹤末代港督彭定康由1992年來港履新一刻，到佢卸任呢5年來嘅生活，除咗肥彭外，仲訪問咗唔少政商界名人。 Dick sir受訪嗰段其實好短，不過網民就好buy嘞。當時未做處長嘅Dick sir，話嗰時做人群控制只需要維持法紀同秩序，但回歸後就唔敢包。佢話如果要做啲不道德同錯誤嘅事，佢會say no。網民就大讚佢有風骨。 網民翻舊帳 播貝多芬掩示威 不過，對於以前示威者嚟講，就未必同意有風骨之說。有人就翻舊帳，話1997年6月30日回歸典禮當晚，作為保安總指揮嘅Dick sir下令播貝多芬嘅《第五號交響曲》，掩蓋示威者聲音。唔知嗰時Dick sir係咪自願咁做呢？講番條紀錄片，記者成日跟住肥彭開會，影咗好多珍貴片段，包括肥彭與同事早上開會，睇報紙剪報時，就問《文匯報》多唔多人睇，大家畀佢問到口啞啞；仲拍到肥彭第一次上京同魯平開完會之後垂頭喪氣𠻹。
|
| |
| |
