【明報專訊】日後除咗導盲犬，市民搭港鐵可能會碰到另一種工作犬，佢哋就係警犬嘞。港鐵公布，同警方合作日後會搵警犬喺車站大堂巡邏，其中兩隻警犬係巡邏犬Hexe同埋緝毒犬Barry，佢哋仲出席咗港鐵噚日嘅防罪活動𠻹。

車站執勤 熟習環境

鐵路警區指揮官譚澤恆講起，警犬嚟緊不時會喺車站執勤，於唔同車站大堂巡邏，熟習鐵路環境，以便遇到罪案或可疑物品時可以快速應變。每隻警犬由一名領犬員帶領，聯同一名鐵路警區警員，一齊行咇。

講番鐵路內罪行，今年頭8個月有764宗，比去年同期下降4.4%。譚sir話無資料顯示鐵路警區毒品問題嚴重，希望引入警犬後，可進一步提醒市民防罪嘅重要。