【明報專訊】伊利沙伯醫院原來已經建院50周年，今年仲出咗本新書，噚日發布會上，伊院三代行政總監，包括前任嘅周一嶽、賴福明同現任嘅熊志添，「三代同堂」一齊分享伊院歷史。
難忘游說政府搞重建
周一嶽回想，1992年獲當時嘅醫管局執行總監楊永強邀請，叫周「幫佢搞掂一間醫院」，於是就抱住即管一試嘅心情「去馬」，唔得就做番醫生，點知最後成為3人中任期最長嘅行政總監。
回想任內難忘經歷，周一嶽話，97年好多政府部門拎咗大筆資源唔知做咩好，於是佢游說政府幫手重建伊院，現時嘅醫療中心、康復中心同貨倉等都係當年起嘅。佢仲話，有好嘅環境先會令同事有工作動力。做過食物及衛生局長嘅佢講到呢度，不忘叫座上嘅「接班人」高永文要多啲利用機會幫醫院更新，而忽然被點名嘅高醫生難免尷尬「O嘴」。
