【Emily】城巴五一吸客 推微信小程序
[2025.04.23] 發表
【明報專訊】下星期就到內地五一黃金周，城巴噚日起喺內地社交平台微信推出小程序「城巴商城」，畀用戶購買Citybus+觀光套票及城巴機場快線相關產品，同埋用二維碼搭車。城巴話，自從舊年推出「觀光城巴」品牌，今年首季嘅客量就比舊年同期增加1.08倍。
近年喺香港坐開篷巴士觀光，成為遊客嘅熱門體驗。城巴舊年經營「觀光城巴」品牌，投資3000萬元擴展開篷巴士車隊同升級設備，預料黃金周期間可接載超過3萬個旅客遊覽港九熱門旅遊景點，已預留額外人手及後備車，再按需要加開路線。
至於「城巴商城」小程序，就有各式旅客紀念品及巴士周邊商品等畀用戶購買，仲有全國送貨。內地微信支付用戶噚日起至下月推廣期內，消費滿150元人民幣就可以減15元。
更多港聞
相關新聞
