【Emily】「雲上西九」短片帶國泰客走入文藝
[2025.04.04] 發表
【明報專訊】西九文化區管理局同國泰合作推出全新短片系列「雲上西九」，向全球旅客推廣本港文化藝術，打頭陣嘅短片《「飛」常文化任務》由藝人Do姐(鄭裕玲)主持，帶大家走入西九及國泰城，了解西九與國泰攜手推動香港文藝創意產業嘅「飛」一般任務。國泰乘客今個月起可以喺機上嘅娛樂系統睇片。
其餘5條短片嘅主持亦分量十足，包括由藝人莫文蔚聲音導航、帶乘客探索香港故宮文化博物館舊年嘅特別展覽「法國百年時尚——巴黎裝飾藝術博物館服飾與珠寶珍藏，1770-1910年」。乘客亦可睇到雷柏熹爵士大樂團及本地流行樂隊RubberBand舊年喺西九舉行嘅「自由爵士音樂節」背後創作歷程。
西九除咗搵藝人拍片，館長亦會落場介紹，M+博物館長華安雅聯同藝術總監及總策展人鄭道鍊會帶大家參觀M+；香港故宮文化博物館長吳志華就會介紹館內嘅建築設計特色、展覽及珍貴館藏等。
西九文化區管理局行政總裁馮程淑儀話，西九每年吸引超過1000萬名訪客，期待透過國泰龐大航空網絡，接載更多觀眾嚟香港，探索西九嘅藝術文化體驗。
更多港聞
【明報專訊】醫衛局噚日公布醫健通流動應用程式增加功能，用戶可以查閱由醫管局、衛生署同私營醫護機構存入個人戶口嘅放射報告，方便大家掌握同管理自...
詳情
相關新聞
