【Emily】國產C919 元旦起每日飛滬港 首航票價至少3300 貴其他機種一倍
[2024.12.27] 發表
【明報專訊】運輸及物流局長噚日公布，中國東方航空元旦開始安排旗下國家自主研製嘅C919客機，每日定期飛香港同上海虹橋機場嘅航線。據旅遊網站資料，東航C919喺元旦朝早8時15分上海首發，至噚晚8點，網站顯示單程機票連稅價錢升至最少3300港元，而同為東航虹橋早上來港其他航班，最平票種只係近1600元，換言之搭C919首發航班貴其他機種一倍。
不過，如果飛機迷想試搭C919而又想平啲，可以考慮元旦由香港飛虹橋嘅航班，當日下午12時55分起飛，據噚晚票價，大概1300元就有交易，比其他機種機票唔使1000元貴少少。Emily留意到， C919首航後，部分日子由上海來港票價「打回原形」，都算實惠。
陳美寶：感受國家成就
運輸及物流局長陳美寶喺facebook話，C919定期航班可以畀更多市民感受國家航空發展嘅成就，已指示民航處同機管局為首航及之後嘅定航提供全面協助，務求為乘客帶來最佳體驗之餘，亦向本地及國際社會積極推廣國家民航科技嘅成就同發展空間。
陳美寶話感謝中國民用航空局一直以來嘅大力支持，而C919標誌國家民航科技嘅重大突破、航空製造業發展重要里程碑，可以畀乘搭C919嘅國際旅客更認識中國民航科技發展。
佢又感謝國家對特區嘅眷顧，話呢次定期航班反映香港作為國際航空樞紐嘅重要意義。
更多港聞
【Emily】吳秋北話「耶誕」先啱 工聯黨友照用「聖誕」
【明報專訊】大家歡度聖誕假期之時，工聯會會長吳秋北近日就提出探討一個學術問題，話叫「聖誕」唔係咁準確，叫「耶誕」可能適合啲。佢喺facebo... 詳情
【明報專訊】教育局課程發展處德育、公民及國民教育組多次舉辦唔同主題嘅價值觀教育電影欣賞暨分享會，教育局長蔡若蓮噚日喺facebook話，希望...
詳情
相關新聞
