【Emily】9次立會大會 林素蔚4次無影 選委界別蘇長荣出席唔夠一半
【明報專訊】新一屆立法會開始接近3個月,睇番立法會資料,連埋實體會議同遙距會議,截至3月30日一共開咗9次大會,大部分議員嘅出席率都達到100%;20名地區直選議員中,19人幾乎百分百出席,唯一一個比較「突出」嘅係新界東南議員林素蔚,9次會議出席率只有56%,即出席咗5次。
直選議員 林衛生panel出席率25%
再睇林議員參與其他會議嘅情况,截至3月25日嘅7次內務委員會會議中,佢缺席兩次;而佢加入嘅3個事務委員會(panel),其中開過兩次會議嘅福利事務委員會,佢全部都有出席,但衛生事務委員會同房屋事務委員會嘅出席率分別只有25%同67%。
Emily透過林素蔚助手聯絡佢,想了解原因,助手話已轉告信息,至截稿前未收到林素蔚回覆。睇番全部議員嘅出席率,同林素蔚一樣大會出席率都係56%嘅,仲有選委會議員、眼科醫生林順潮,同喺選委會界別嘅蘇長荣更只係出席咗4次會議,出席率唔夠一半。Emily記得今年1月召開首次立法會大會時,蘇長荣都無現身,當時佢回覆話屋企有突發事,出席唔到會議。