【Emily】推病人上斜睇急症 醫護不負「重」任
[2022.04.02] 發表
【明報專訊】第五波疫情終於稍為回落，上月疫情高峰時，唔少市民叫唔到白車同預約唔到指定診所，但其實前線醫護一直好勞碌咁照顧病人。醫管局噚日喺facebook發文話，貝夫人普通科門診診所嘅指定診所，高峰期每人每小時要接超過60個電話，但同事依然好細心聽，資深護師林嘉琪上月中就接到一個病人來電，當時隔住電話聽到患者咳嗽同氣促，十分在意，於是安排佢即日診症。
指定診所高峰每人每小時接逾60電話
病人到達診所時，診所一班同事相當驚訝，因為佢體型「頗為有分量」，但因為病人氣促同咳嗽嚴重，加上血氧量低見90%(正常應在95%或以上)，需送往醫院急症室。奈何當時叫唔到救護車，醫護當場決定人手將病人送往律敦治醫院。診所同醫院雖然相隔唔遠，但要經過一條上斜路，林嘉琪話醫護著住保護衣、分工推病人同氧氣樽上斜，即使習慣行斜路，當時仍覺得「前所未有吃力」，幸患者最終順利抵達急症室。
醫護：習慣行斜路 仍覺前所未有吃力
醫管局話，醫護喺疫情下肩負「重」任，唔單止幫病人上斜路，更會負起讓確診病人及早得到適切治療嘅責任。
更多港聞
【Emily】梁熙愚人節自嘲「成功爭取小西灣站」
【明報專訊】噚日喺4.1愚人節，唔少人都喺社交媒體放「流料」自娛。民建聯立法會議員梁熙去年選舉時，話要爭取興建西灣河地鐵站，成為一時佳話，事... 詳情
【Emily】獄中寄信太太 阮民安：會努力撐住
【明報專訊】歌手阮民安（Tommy）被控「作出一項或多項煽動意圖的作為」罪，正還押候審。太太張倚雯（Eva）喺facebook公開部分獄中信... 詳情
相關新聞
