【Emily】鄭泳舜陳智思做gym 傾體育社福政策
【明報專訊】立法會選舉候選人紛紛搵知名人物拍片支持,參選九龍西直選嘅民建聯鄭泳舜就搵嚟行政會議召集人陳智思,兩人著住運動裝,片段一開始就係佢哋分別喺健身室做gym,又舉鐵又輪流揮動戰繩等。兩人一向做開運動,健身時顯得好輕鬆,之後就大談體育、社福等政策。
曾經做過10年立法會議員嘅陳智思話,佢好鍾意運動,非常開心推動運動政策,「最衷心提倡體育嘅係你」。談及社福議題,鄭泳舜又同本身係社聯主席嘅陳智思討論過渡房屋,話要點樣做多啲過渡房屋紓緩房屋問題,點樣令入住者更快適應、融入等。陳智思話,新一屆政府、立法會有好大責任,大家要傾吓點解決問題,「唔係有人嘈就話唔做」。
同區另一候選人梁文廣連日到區內各處拉票,從佢facebook所見,經民聯梁美芬不時陪同佢周圍去,而佢前晚去又一村拉票時,就見到街坊兼該區前區議員李梓敬,兩人曾經係深水埗區議會同事,李梓敬亦有同佢一齊向街坊揮手企站。
九龍西候選人仲包括馮檢基。李梓敬參選新界東北,同區候選人包括陳克勤、黃頴灝、黃成智。梁美芬參選選委會界別,界別共51候選人,名單見立法會選舉網站。