【Emily】麥美娟搞智庫 強調唔係為選舉
【明報專訊】香港有唔少民生問題仍待解決,工聯會麥美娟(Alice)噚日宣布成立智庫「治港新政」,匯聚唔同專業界別人士希望做政策倡議、改善香港管治。佢哋主要關注六大範疇政策,包括新時代下嘅勞動市場、國家行政同公共政策、土地房屋同基建計劃等,Alice希望兩三個月內完成首份研究報告,題目「唔係土地房屋就係創科」。雖然智庫獲得工聯會支持,但Alice強調研究會獨立運作。
首炮研究房屋創科
行政會議成員湯家驊成立嘅民主思路都係智庫,但以往有成員參選立法會;Alice就強調治港新政成立唔係為咗選舉或者「推人入政府」,選舉制度修改後香港政治亦非只圍繞選舉,而係要「更高角度」、給出治港良策。佢透露智庫目前有十多廿名成員,亦陸續有人加入,但強調如果加入係為參選、曝光或者「搞大龍鳳」,就未必符合佢哋實幹理念。
陳弘毅譚耀宗譚惠珠任顧問
治港新政顧問委員會包括全國人大常委譚耀宗、基本法委員會副主任譚惠珠、港大法律學院教授陳弘毅等人;成員就包括前測量師學會長郭岳忠、香港法學交流基金會秘書長陳曉鋒、鐵路運輸專業人員協會主席張年生等。
同為智庫成員嘅工聯會鄧家彪就話,有時遇到一啲專業人士,但對方未必適合加入工會做理事,所以組織智庫,等佢哋貢獻專業所長都好,強調唔係政黨、亦毋須跟從召集人口徑。