• 2021.01.02
    星期六

【Emily】元旦無遊行 改車巡展連儂布 民陣車頂叫口號 警包圍話犯聚

[2021.01.02] 發表
民陣噚日發起「釋放政治犯」嘅車巡行動,首站停喺荔枝角收押所外。民陣召集人陳皓桓(車上左起)、支聯會主席李卓人、民陣副召集人葉錦龍喺車頂發言,一度有10幾個警察到場話佢哋違反限聚令。(李紹昌攝)

【明報專訊】受疫情同限聚令等影響,民陣噚日無發起「元旦大遊行」,選擇同各政黨、區議員喺全港18區懸掛超過30塊「連儂布」橫額,又發起「釋放政治犯」嘅車巡行動,由荔枝角收押所外出發,途徑尖沙嘴、銅鑼灣等,最後駛到金鐘立法會附近。民陣召集人陳皓桓、副召集人葉錦龍,同埋支聯會主席李卓人出發前喺車頂發言,高呼「釋放政治犯」等口號,車輛一度畀10幾個警察包圍,話佢哋違反限聚令,不過警方最後無發出告票。

荔枝角收押所外喊「釋放政治犯」

根據民陣嘅相片,「釋放政治犯」橫額噚日喺多處展示,例如羅湖懲教所外、黃大仙廣場外、維園,甚至喺商場懸掛,展示者亦高舉「五一」手勢。

陳皓桓話雖然噚日搞唔到遊行,但都要話畀政府知自己會堅持發聲;李卓人就向收押所內嘅「手足」大喊,話港人無忘記佢哋嘅付出,叫大家一起撐下去。

陳皓桓又批評警方刻意阻撓行動,重申貨車唔係公眾地方,質疑點樣違反限聚令。佢話雖然不斷被打壓、檢控,但唔會放棄爭取五大訴求、民主自由等。對於「元旦大遊行」無法舉辦,佢話感到抱歉,又話疫情後民陣會繼續申請遊行。

更多港聞
【Emily】何君堯麥美娟話泰博「無賴之冠」 唔跟總辭係「建制派臥底」 倡加人工
【明報專訊】2020年過去,同屬立法會新界西議員嘅建制派何君堯、工聯會麥美娟(Alice)前晚做網台節目,其間話要選出2020年「反對派十大... 詳情
【明報專訊】唔少人近日都回顧剛過去嘅2020年,香港警察噚日喺facebook盤點2020年同市民「加強溝通」嘅數據,提到為促進同傳媒溝通及... 詳情
【Emily】徐英偉容海恩元旦去捐血
【明報專訊】2021年新年伊始,民政事務局長徐英偉(Caspar)同新民黨立法會議員容海恩(Eunice)噚日不約而同去咗捐血。捐血前Cas... 詳情

明報網站 · 版權所有 · 不得轉載
Copyright © 2019 mingpaocanada.com All rights reserved.
Ming Pao Daily News A wholly owned subsidiary of Ming Pao Enterprise Corporation Ltd.
Vancouver Chinese Newspaper

5368 Parkwood Place, Richmond B.C. V6V 2N1 | Tel.: (604) 231-8998 | Fax: (604) 231-9881/9884 | Advertising Hotline Tel.: (604) 231-8992