【Emily】now《大鳴大放》暫緩揾李慧琼主持
【明報專訊】早前民建聯主席李慧琼(Starry)向傳媒承認將喺now新聞台時事節目《大鳴大放》做嘉賓主持,引起政界唔少討論,之後傳出台灣殺人案死者潘曉穎嘅媽媽因此拒絕接受now新聞嘅訪問。now新聞台噚日就話現階段唔會加入新主持,Starry亦發聲明話now新聞台暫緩邀請,佢感到十分惋惜,但充分理解同尊重有關决定。
李:陳鐵彪話有揣測同攻擊
now新聞台發言人同Emily講,留意到各方對《大鳴大放》嘅改革有唔同意見,現階段唔會加入新嘉賓主持。
Starry噚日下晝喺立法會被問到此事時,仲話未有最新消息,會專心做好議會工作,點知夜晚就出聲明。Starry承認之前應承咗now新聞台主管陳鐵彪嘅邀請,以嘉賓主持身分參與《大鳴大放》,籌備工作本身即將開展,但噚日收到陳鐵彪嘅信息,話因為有啲揣測同攻擊,話佢「取代記者主持訪問」,同埋係幫佢「選舉提供宣傳平台」,加上潘媽媽因為咁而拒絕畀now拎到佢嘅錄音錄影片段,故暫緩邀請。