【Emily】葉劉又貼旗袍相：你食咗月餅未？

新民黨主席葉劉淑儀（圖）噚日又上載著旗袍嘅相，相中有句「你食咗月餅未？」。（葉太facebook圖片）

【明報專訊】新民黨主席葉劉淑儀前排同黨內一班兄弟姊妹影咗輯旗袍西裝相，佢噚日晨早趁住國慶及中秋佳節，上載自己嘅個人旗袍相，9張相換咗4款旗袍，張張都配上唔同字句。其中一張，身穿藍色旗袍嘅葉太右手拎住月餅、左手揸住電話聽筒，配上「你食咗月餅未？」呢句。

民建聯都有出片賀中秋同國慶，港島區立法會議員張國鈞就派任務畀佢團隊嘅3個「才子」，去挑戰其他民記立法會議員「猜燈謎」，分別出咗「爬竹竿」、「游泳比賽」、「聽診器」3個題目要猜四字，又出咗「三張紙」叫猜一字，被佢哋挑戰嘅議員都估到，唔知大家又估唔估到呢？

民記議員玩猜燈謎

出登高唱歌片

另一條片就係民記立法會議員陳克勤、劉國勳聯同其團隊，去咗烏蛟騰烈士紀念園向英烈致敬。克勤喺片中話噚日係國家國慶71周年大喜日子，歡慶之餘亦要感謝前人付出嘅血汗，作為中國人更加要銘記歷史。佢哋幫手抹烈士石碑、獻花，並唱國歌。而柯創盛、民建聯副秘書長黎榮浩聯同民建聯九龍東兄弟出音樂短片，成班人登高唱《勇敢的中國人》，柯仔同黎榮浩仲輪流喺山上揮動國旗𠻹。

更多港聞

【Emily】歷武漢封城「戰時狀態」 馮浩賢離任稱無愧

【明報專訊】內地中新網前日率先報道，年初留守武漢支援滯留湖北港人嘅駐武漢辦主任馮浩賢3年任職期滿，即將離任，Emily噚日報道咗佢嘅接任人係... 詳情

【Emily】被國慶橫額霸位 區議員李家偉：邊個咁大整蠱

【明報專訊】噚日國慶日，全港多區都有掛上慶祝國慶嘅橫額，有啲仲掛咗喺區議員嘅banner位。屯門區議員李家偉前日喺facebook發文，問究... 詳情