【Emily】之鋒放狗被跟 大媽山頂粗口恭候
[2020.08.24] 發表
【明報專訊】前香港眾志秘書長黃之鋒透露不時被跟蹤，噚日佢去山頂放狗，都有中港車牌七人車尾隨，喺山頂更畀「藍絲」滋擾。之鋒話喺灣仔區揸車上山時已覺奇怪，有中港車牌七人車尾隨，抵達山頂公園泊車時，隨即見到有中年婦人影佢，質疑件事唔係隨機發生，係有人喺山頂公園等佢出現。
「黃之鋒到咗，你哋快啲」
由之鋒開嘅live可見，一名大媽影住佢、不斷講粗口，如鬧佢「唔×歡迎漢奸走狗，唔×歡迎你，漢奸走狗搞亂香港」，又話之鋒同行友人係「雞」。之鋒都動咗氣，話上山頂唔係為咗浪費時間開「城市論壇」，批評大媽完全係非法滋擾。之鋒話，當佢同人爭論緊時，朋友聽到該中年女士打電話並話「黃之鋒到咗，你哋快啲」，之後又有幾個藍絲泊低一架Volvo私家車，並加入戰團鬧佢。
私家車登記地址紀律部隊宿舍
之鋒其後查冊，發現及後加入戰團嘅私家車，登記地址係順利紀律部隊宿舍，登記車主姓黎，佢話車主姓名「巧合得不能再巧合，跟一名在職警長同名同姓」。
之鋒話跟蹤佢去記招、街站，佢都見怪不怪，但誇張到放狗都滋擾就未試過，呼籲市民如果喺街遇到藍絲大叔大媽滋擾民主派，懇請伸出援手。
更多港聞
【明報專訊】2010年馬尼拉康泰旅行團人質事件造成港人8死7傷，呢場悲劇噚日踏入第10年，協助事件家屬嘅立法會議員涂謹申話，當年同菲律賓政府...
詳情
相關新聞
