【Emily】中大學生會家書 寄語新生守護山城
【明報專訊】大學聯招(JUPAS)前日放榜,中大學生會幹事會臨時行政委員會噚日喺fb寫「家書」畀一眾新生,話中大人喺香港嘅民主運動上從不缺席,幾十年前到𠵱家都一樣。家書話學生第一日由火車站踏足中大,首先見到嘅民主女神像,曾經由幾千個中大師生同港人喺重重波折下護送到中大。信中話今年新生係被時代選中嘅中大人,話由𠵱家起,傳承中大精神、守護山城嘅重責就落喺佢哋身上。
呂智恆:榮幸與義士經歷所有
唔少中大人見到呢封信都好有感觸,喺中大讀緊神學、去年曾經被捕嘅社工呂智恆就留言回應,話無論最後自己使唔使坐監,都希望喺中大完成人生最後一個學位,「榮幸與眾義士經歷所有與奮進」。
校園秀麗依舊 因眾人誓死保衛
家書寫道,中大嘅校園風景秀麗依舊,係因為上年11月有一眾中大人同香港人誓死保衛校園;而中大校園仍然保留學術自由之風,係有無數先賢同教授喺體制內外寸土不讓,唔會因為強權打壓而自我噤聲。
文章又話,但願新生保存赤子之心,話雖然前路漫漫而險惡,但冇一個中大人會係孤身一人,「盼望在這荒謬絕倫的世代,這個家能成為你的避風港」。