【Emily】鬧泛民地產霸權引發「內訌」 陸頌雄畀石禮謙斥最可恥

工黨張超雄（背向鏡頭者）喺泛民離開後，獨自高呼「李慧琼越權」口號接近一個鐘。工聯會陸頌雄（前排右一）拎杯水畀超雄，超雄拒收，繼續叫口號。（林若勤攝）

【明報專訊】立法會內會會議噚日喺一片混亂下舉行，其間建制派一度「內訌」。工聯會陸頌雄喺會上發言批評民主派時，多次稱民主派同「地產霸權」有關，地產及建造界立法會議員石禮謙立即反駁話「地產無霸權」。唔知係咪現場太嘈，陸頌雄似乎無留意到石禮謙嘅反駁，仲繼續講地產霸權可恥，石禮謙最終忍唔住除低口罩大聲反駁，話陸頌雄「你先最可恥」。

張超雄獨留抗議近句鐘

麥美娟諷「畀杯水佢」

另一方面，11個民主派議員被逐離場，幾個民主派議員亦因不滿民建聯李慧琼(Starry)越權主持內會拉隊離場。工黨張超雄喺泛民隊友離開後，獨自留喺主席台前，高呼「李慧琼越權」口號近成個鐘。工聯會麥美娟發言時，笑住話超雄「陰功」，畀民主派「瀨低咗」，要求搵人畀杯水佢。但其實當時會議室內，衛生服務界立法會議員李國麟(Joe)一直充當超雄「背後嘅男人」，企喺記者席旁睇住超雄。

民建聯黃定光就走向Joe，叫佢拎杯水畀超雄，Joe笑一笑無理。工聯會陸頌雄之後就去拎杯水畀超雄，超雄拒收，繼續叫口號。多名建制派隨後批評超雄叫口號阻止會議，要求Starry趕佢走。Starry最終多番警告超雄無效後，驅逐佢離場。

更多港聞

【Emily】劉小麗宣布唔參選立會

【明報專訊】立法會前議員劉小麗2016年因宣誓風波被DQ，2018年參加九龍西立法會補選時，又畀選舉主任DQ、裁定提名無效。已加入工黨嘅劉小... 詳情

【Emily】鄭耀棠倡深圳撥地作港人新社區

【明報專訊】港區全國人大代表鄭耀棠久未露面，上年因為身體抱恙缺席「兩會」，佢噚日現身工聯會記者會，睇落精神唔錯，但就清減咗。佢話今年會上兩會... 詳情

【Emily】612基金剩3000萬 籲市民捐款

【明報專訊】上年成立、支援因反修例風波被捕、受傷等抗爭者嘅「612人道支援基金」，前晚公布截止3月31號嘅工作簡報，基金成立至今共籌得超過1... 詳情