【Emily】羅致光拍片邊讚外傭邊提勿聚集
[2020.04.03] 發表
【明報專訊】「限聚令」禁止多於4人喺公眾地方聚集，但仍有外傭喺公眾地方聚會。勞工及福利局長羅致光噚日拍片感謝外傭對香港社會嘅貢獻，話好明白外傭希望喺休息日同朋友見面，但現時處於抗疫重要時刻，有必要保持社交距離，防止疫情擴散。勞福局嘅短片製作咗菲律賓文、印尼文同泰文3種字幕，亦會同總領事館合作，經佢哋嘅網頁及社交媒體平台向其國民傳遞相關信息。
據Emily了解，勞福局仲會搵車喺外傭聚集地點廣播，提醒佢哋唔好多過4個人聚集，例如維多利亞公園同中環；警方同食環署職員都會加強巡查。
維園中環廣播 大堂貼告示
局方會喺全港張貼載有上述3種外傭主要語言嘅海報，仲搵埋所有物業管理公司、公屋，請佢哋喺大堂張貼告示，宣傳「勿聚集」嘅信息。另外，局方搵咗政府嘅電視屏幕播放相關呼籲，而以外傭為對象嘅電台節目都會幫手宣傳。
更多港聞
【明報專訊】政府近年着重網上宣傳，立法會議員毛孟靜就特別向財委會書面提問有關成效，特首辦回應話，自特首林鄭月娥嘅facebook專頁於201...
詳情
相關新聞
