【Emily】民記抗疫平台 幫灣仔區會員買餸
[2020.02.19] 發表
【明報專訊】武漢肺炎疫情持續，民建聯噚日宣布成立「港島抗疫平台」，目前搵到10萬個口罩，將透過平台向登記申請嘅港島居民派發，同埋幫登記會員買餸，避免佢哋出街增加感染風險。被問到加強地區服務係咪同9月選舉有關，民建聯立法會議員張國鈞話，𠵱家已經冇乜人講選舉，「左中右都諗緊點對抗疫情」，希望大家放低政見，喺關鍵時刻下團結抗疫。
網設登記系統 再分物資
民建聯將會喺地區服務處同網上設立登記系統，再分發口罩、漂白水等物資畀有需要嘅人。民建聯灣仔區支部主席鍾嘉敏話，正為灣仔區會員推行「為你餸」計劃，幫會員代買冰鮮雞同雞蛋等食物。會員每逢星期一至五可以致電落單，避免經常出街買餸。
至於抗疫平台設立嘅登記系統，會唔會引起收集市民個人資料作其他用途嘅問題，民建聯副主席陳學鋒話，「我哋做咩都有人會講」，但今次只係收集基本資料。民建聯另一團隊、民建聯立法會議員李慧琼及葛珮帆，噚日都向3個病人組織轉贈由熱心者捐贈嘅防疫用品，包括3萬多張酒精消毒抹紙及約1萬個口罩。
另外，實政圓桌立法會議員田北辰都話搵到3.5萬個口罩，將會捐畀社區組織協會，再轉贈畀有需要嘅長者同長期病患者。
更多港聞
【Emily】歷鉛水風波 林天星任西九增選成員
【明報專訊】西九文化區管理局董事局噚日宣布，委任發展局前局長馬紹祥、水務署前署長林天星成為西九管理局轄下嘅發展委員會增選成員，任期由今年2月... 詳情
【明報專訊】香港眾志喺中美洲國家洪都拉斯買咗120萬個口罩，呢批口罩日前送抵香港，民主黨同公民黨各自分配到35萬個。民主黨南區區議員徐遠華本...
詳情
相關新聞
