【Emily】街坊求助 提議張秀賢搵「整口罩機」
[2020.01.30] 發表
【明報專訊】全城搶口罩，即使有錢都買唔到，好多市民搵區議員求助，希望佢哋幫手搵貨，但部分街坊似乎當區議員「萬能」，可以隨時搵到口罩派畀大家，唔少區議員就喺網上嘆道，話有街坊提出太多不切實際嘅建議，例如叫區議員搵部可以整口罩嘅機返香港；亦有區議員喺網上聲明「我不是口罩供應商」，希望街坊體諒一時三刻派唔到口罩。
區議員：我不是供應商
元朗區議員張秀賢喺facebook話，作為區議員只可以盡力搵貨源，睇吓可唔可以做到團購或代購，「我必須要同大家講清楚，我唔係黃大仙，亦都唔係嗰班每月淨袋30幾萬，只係做3日就賺到區議員份糧嘅高官」。佢話，做區議員人手、資源、心力、時間都有限，無可能樣樣嘢都做得到；並無奈地透露，收到市民建議佢搵部可以整口罩嘅機械返香港。
觀塘區議員陳易舜強調自己已經盡力幫大家搵口罩，喺網上公開聲明「我不是口罩供應商」，希望街坊體諒。
曾任區議員多年嘅人民力量立法會前議員陳偉業就喺張秀賢facebook留言，希望啲民選區議員唔好公開投訴居民，又建議全體民選議員可以要求台灣總統蔡英文提供協助，「佢可能會願意送口罩畀香港市民」。
更多港聞
【Emily】雖然老婆嫌少陪屋企 陳沛然：考慮競逐立會連任
【明報專訊】9月就係立法會換屆選舉，現任議員係咪尋求連任成關注。立法會醫學界議員陳沛然（Pierre）話，太太唔希望佢連任，但自己考慮緊競逐... 詳情
【明報專訊】今年嘅農曆新年遇上武漢肺炎，唔少新春團拜、活動都要取消。中聯辦亦喺網站發出公告，話因應新型冠狀病毒肺炎疫情防控工作要求，經研究後...
詳情
相關新聞
