【Emily】齊鼓掌熱烈唱 歌唱祖國 林生齋企
[2019.12.21] 發表
【明報專訊】澳門回歸20周年，前晚(19日)舉行文藝晚會，特首林鄭月娥同丈夫林兆波都有出席，事後林兆波更成為全港網民嘅焦點！話說現場播放《歌唱祖國》時，畫面影到嘅在場者都一邊拍手打拍子、跟住唱，唯獨林兆波企定定喺度。鏡頭影到林生嗰5秒，佢嗰嘴無乜點郁，雙手垂下、左手疊右手，眼定定望住前方，喺唱和嘅人群中可謂非常突出。
旁邊張曉明林鄭拍住手唱
睇番當時嘅片段，企喺台上嘅國家主席習近平、澳門時任特首崔世安同新任特首賀一誠，同企喺台下嘅港澳辦主任張曉明同林鄭月娥等，都一邊拍手打拍子，一邊跟住一齊唱，唯獨林兆波企喺林太同張曉明中間，乜動作都無做，非常平靜。唔知林生留唔留意到周圍嘅人，包括身邊嘅林太做緊咩動作呢。
有人話「最前線勇武派」
林生呢番舉動引起好多網民注意，有人形容林生係「義士」、「超前線手足」、「最前線的勇武派」，甚至有人話其實林生「個心唱緊《願榮光歸香港》」；亦有人希望大家「打格」、刪片」，以保護林生，對手足「不篤灰，不割席」。
今次林兆波「無動作」引起咁多人留意，相信都可能會同佢上年喺禮賓府，畀心急同影星惠英紅影相嘅林太一掌推開嗰幕一樣，成為熱話一段時間。
更多港聞
【明報專訊】立法會財委會仲未完成審議公務員加薪撥款，下次開會係下月10號，撞正台灣大選。民主黨立法會議員林卓廷同Emily講，為咗留守香港審...
詳情
相關新聞
