【Emily】消防：副處長曱甴論「不最為理想」 林卓廷：荒謬兼雙重標準
[2019.12.03] 發表
【明報專訊】民主黨議員林卓廷之前就副消防處長梁偉雄喺內部講座稱呼示威者做「曱甴」，向公務員事務局投訴，消防處噚日覆咗佢，話副處長只係出席一個內部座談會，仲話「曱甴」唔係指稱一般示威者，及對紀律調查隻字不提。林卓廷質疑佢雙重標準，反問香港係咪荒謬到咁嘅程度。
副處長講座稱示威者「曱甴」
林卓廷投訴
林卓廷10月尾去信公務員事務局，投訴副消防處長梁偉雄喺消防及救護學院一個講座期間稱呼示威者做「曱甴」，話梁偉雄嘅言論令公眾震驚不安，嚴重違反公務員應有嘅操守同紀律，要深入紀律調查。消防處噚日回覆就話，副處長只係出席一個內部座談會，「曱甴」嘅言詞唔係講緊一般示威人士，而係指「罔顧法紀的暴徒」；並話「曱甴」用詞對「公眾觀感並不最為理想」，無回應到會唔會做紀律調查。
林卓廷對消防處回覆表示震驚，指消防處話「並不最為理想」，即係呢個言論都係理想，只不過唔係最理想，反問香港係咪荒謬到咁嘅程度。
佢又提到，有公務員喺私人圈子個人facebook質疑警方執法，都要即時接受紀律調查，反觀梁偉雄就完全唔使負責，質疑政府雙重標準。
更多港聞
【Emily】防暴「畀心」前 食咗Show me your love飯？
【明報專訊】新任警務處長鄧炳強近日頻頻話要用「剛柔並濟」嘅手法處理示威，前日尖沙嘴「毋忘初心大遊行」就出現有防暴警察向正怒罵佢哋嘅示威者，高... 詳情
【明報專訊】香港理工大學早前爆發衝突，警方封鎖13天後於上周五（29日）解封，校方隨即接管校園。理大校董會主席林大輝昨日出席商台節目，談到校...
詳情
相關新聞
