【Emily】鄭則文譚香文成票王票后
[2019.11.26] 發表
【明報專訊】喺投票率新高下，區選候選人票數大增，咁票王、票后係邊個呢？Emily睇過，票王係77歲、出戰沙田恒安選區嘅民主黨元老鄭則文，佢取得6824票；票后係黃大仙龍星選區嘅譚香文，佢以6098票成功連任。
若以得票比例計，屯門兆置選區嘅民主黨林頌鎧得票率最高，拎到5798票，大勝報稱獨立、得1623票嘅王加良，得票率高達78%。沙田博康選區、沙田區政嘅趙柱幫亦取得6421票大勝對手，得票率74%。
元朗屏山北 建制贏兩票
選情最緊湊嘅係元朗屏山北選區，獲建制支持嘅楊家安以2221票，險勝獲2219票嘅民主派素人羅庭輝，兩者只差兩票。羅庭輝喺facebook話核票過程倉卒，正積極考慮提選舉呈請。喺深水埗石硤尾選區，民主派素人冼錦豪得3235票，以10票之微力壓現任區議員陳國偉當選。
今屆區選得票最低嘅候選人，係出戰元朗元龍選區、無填到任何政治聯繫嘅周樂寧，只有7票。元龍選區由中大學生會前會長張秀賢以3177票，擊敗另一對手、現任元朗區議會副主席王威信當選。
票王鄭則文話，今次連續第6屆當選恒安選區，好感謝街坊信任支持，佢話一直好鍾意做民生工作，同唔少街坊關係唔錯；問到有咩取勝心得，佢話要盡最大能力，跟進同協助街坊關注嘅問題，做唔做到都要回覆街坊。
Emily亦同趙柱幫傾開，佢話今屆好多選民關注候選人嘅政治立場，同以往較多要求做好地區工作有分別，上任後會要求區會徹查警暴問題。
更多港聞
【明報專訊】唔少政治素人初試啼聲就成功當選，但亦有候選人屢敗屢戰、屢戰屢敗，有「地獄黑仔王」之稱嘅民主黨中委莊榮輝，自2003年起一直參選區...
詳情
【明報專訊】香港學校音樂及朗誦協會（下稱協會）早前宣告取消部分「第71屆香港學校朗誦節」賽事，稱是考慮社會不明朗情况和參與者安全等，按機構通...
詳情
【明報專訊】香港學校音樂及朗誦協會（下稱協會）網頁指出，協會於1940年成立，1975年獲批准註冊為無股權的非牟利有限公司。本報翻查協會最新...
詳情
相關新聞
